Wan

Ton

Wan

Kshaid Ramsing

Kshaid ramsing

HANGNO BA DON KA JUBAB

HANGNO BA DON KA JUBAB

Kumne jingim haka pyrthei,
Ba dap tang jingkylli,
Ïa ki jubab ngan shem naei ?
Kylleng ngan wad ïaki.

Bunsien nga ngam sha ki ñiamra,
Bym ïohi sngi i bnai.
Wat na ki ksuid ba don hangta,
Nga leit ban pan jingshai.

Ka duriaw bah ki khlur nga jngi,
Hangtei hapoh sahit
Naduh tyngkong jong ka mei ngi.
Shaduh ki ri ïongngit.

Balei ngan shu pynshong lyngngeit?
Ha nongrim b'la seng lypa
Bunsien nga lap wat ka jingngeit
Ka long kaba bakla.

Shaduh sha rngai ki jingmutdur
Ha ramïa ka Pyrkhat
Halor ka sla ka sohmyndur
Nga kwah ban ïaid jahthait.

Hakhrum ki kshaid,harud ki thwei,
Nga leit ban shong syaid sngi,
Ki thei bhabriew,ki puri blei,
Sawdong ka pung ki jngi.

Ha trai ki dieng ba kah syrngiew,
Ki dymmiew tngen janor;
Jylliew hapoh ka dohnud briew
Ki tlong ummat ba tlor.

Shaba pyrthei kam lah ïohi
Ha lyndet jong u bnai,
Ha lynghoh kti ki larmoti
Nga bret ki jingkhuslai.

Bunsien nga poi tiap ha tyngkong,
Shipor ban ïoh shongkai,
Ryngkat ki kñi ki pakulong,
Kiba la thiah ha rngai.

Shaba ki khmat jong ka Pyrkhat
Kim lah shuh ban kynjoh
Kumne man la ka khyllipmat,
Nga sah ha ka lyngngoh.

NA KA MYNNOR SHA KA LANOR

NA KA MYNNOR SHA KA LANOR

Ki symboh krai,symboh 'hadem
Ha i syrdep bala saw tdem,
Kyndoi i ruh,bala ïong bthing,
Halor tyngier b'la sur d'u pring.

Da kumta keiñ la panjira,
Da ki pateng lyngba ki rta;
Ïaka Pyrkhat ki longshuwa,
Hapoh ki kpep jong ka ramïa.

Suki suki la liat ka klet,
Ha ki dympuiñ ïaki ban bet,
Lyngkha-risa ki sdang syllei,
Ym don ba smat ka khih ka trei.

Mano ban plie ka dabia ksiar?
Ki larmotti-mattilyngksiar.
Ki sngi barim b'la sop 'ñianglong,
Ban kynoi thiah haki palong.

Ynda tynneng ka ïoh shong khet,
Ka sur tynrai kala putet,
Ka rongïapan ka ïeng rasong
Ka 'langtylli ka ïoh kiew skong.

U 'tiew shyllong phuh miet u krei,
Ha ki pahar,u sdang jyllei.
A ! Maipap blei, la kie berong,
Ki mangkarong ba beh rongphong.

Ynda seiñthli u kiew tyngkong,
U sdang patied u thwat ar-tdong.
Ka lait kylla,u kyndang kwah
Ï'u kohkarang un dungtohsah.

Wat haba shai ba shit ka sngi,
U dongmusa ngi bat ha kti.
Kumno mynnor jingshai ki tbeh ?
Sawdong ka ri tang da u kseh.

Khana kynthong kiba jylliew,
Na ka jongblei wan ka longbriew.
Ka saiñ pyrkhat bymlah peiba,
Khana ngeit biej, ngi pynshata.

Mattah la ïing,kam ju iehnoh,
Kyndung ka knup, ha met ka snoh.
Hato tusbir jong ka hyndai ?
Kin lngaid kin lwait sha ri ki rngai.

I lyngwiar dpei,ngi la pynduh,
Ka sneng ka kraw, A ! hangno shuh ?
Kane ka juk myllung shempap,
Kan ïaid pukir kat shaba lap.

Balei ngin sah khyllung khynnah ?
Ïa jong u ar ban bud ngi lah.
Bym noh ka mon,ki mih ki daw,
Ryngkat ki nia ki 'tien shu thaw.

Ïa ka mynta, da ei ngin ai ?
Ban sah pyrto lawei ladai,
Lawei ka ri kan shat phyrnai,
U Moina ksiar ngin ym tyngkai.

Ko 'er iwbih wan beh na jngai,
Ko simpyllieng ! Ale wan khwai,
Naduh ki lngit jong ka mynnor,
Shaduh sha ki tmier jong ka por.

A LAPONGNAI

      A !!  KO LAPONGNAI

Kylleng nga la wad,hapneh ka mariang.
Katba don ka lad, ïaphi ban shem biang.
Phewse lehnohei, ïa phi ngam shem shuh.
Nangne na pyrthei,phi la khlad jynduh.

Nga shu sah lyngngoh,marwei kum u biej.
Ngam lah ban Pyrkhat,la teh u thylliej.
Balei keiñ kumne,ïa nga phi iehnoh.
Shajngai bah phi her,sha lyndet jong ki lyoh.

Da kumne kumtai,tang ban shu pyn myllen.
Kumne man ka sngi,ïalade nga pyntngen.
Hynrei hapoh kut,ka kyan mynsiem ka ïam.
Shabar ngam pynpaw,watla khmat ki kiew snam.

Mynmiet bad mynstep, ka lyer ka dang suhsieng.
Nga jngoh laki khmat,ha ki rong simpyllieng.
Ka dur khmat jong phi,ha ki lyoh ka wan paw.
Haba shit ka sngi,mynba hap u 'lap praw.

Katno sngew myllung,ïalade sngew synei.
Ka mynsiem ka um,ryngkat ummat ba shlei.
Nga kyang khlem mih sur,tang ïaphi nga pyrta.
Ïa nga phi shu wiat,phi jah noh mar kumta.

La dei tang ka rngai,pynban nga shaniah skhem.
Kumne man ka sngi,ki jingkyrmen nga shem.
Haba sngewkynjah,,ngan kynud sur jingrwai.
A !! Ko lapongnai,ha syrngiew jong u bnai.

KI SUR MYLLUNG KA MARIANG

KI SUR MYLLUNG KA MARIANG

Ha jingkyrkieh ban poi noh kloi
-sha ïing na jingbylla.
Kali u ïuh u pynher sted
Kumba kynruh Shana.

Ka por la miet shiphew duna
Marwei u shu Pyrkhat
"Katta ha ïing ïa u ki ap"
Bad ki ban don ryngkat.

Hynrei hangta khlem poi Pyrkhat
Dang ha shiteng lynti,
Sha ïing ban poi dang kloi um lah
Ba sniew noh ka Kali.

Marwei hangta u la jakhom
Ryngkat ka tim ka tla.
Nalor bala kyrkieh lupa
Sa kumta pat ka jia.

Shu khum shi khum u khih u shna,
Tang kumno ban longïaid.
Phewse watla kali ka start
Tang hajuh pat ka ksaid.

Hangta u sdang ban dial number
Shaïing tang ban phah shaw.
U khie bitar bymdon signal
Ka phone kum ban lynthaw.

Hangta u ïeng ban ap kali
Thapngab tang marwei briew
Kali ban hiar ym don satia
Lait tang ki trok ba kiew.

Ka dei ka arphewsaw tarik
Duna nongïaid nongïeng
Baroh baroh kila poi shnong
Ba ki beh jingïaseng.

Ynda slem slem ba u la ap
Khatduh u lap ka ngiah
U rung noh khop hapoh Kali
Ka seat u pynshaniah.

Marwei hangta ki khmat u lip
Ki shkor pah ñiangkynjah
Ka kti ka kjat slam slam ka pjah
Ka miet bajur u thah.

Ha shkor jong u lyer ki wanrah
U sngew la kum ha rngai.
Jingrwai kristmas na sha jngai bah
Ïa u ki shoh ngai ngai.

Dei hangta keiñ u jem mynsiem
Ummat ki sdang kyrsei.
Ki sur bathiang jong ka mynnor
Um tip ki wan naei.

Ki sur myllung jong ka mariang
Ïa u sha rngai ki rah;
Sa shisien pat sha thwei ka por
Ki sngi jinglong kynnah.

Marwei marwei u phuh samrkhie
Ryngkat ummat ba shlei;
Ki sur jingrwai u sdang kynud
Jingkmen ym don pyrthei.

Hangta hapoh ki rngai pyrkhat
U ïohi ïalade.
U khynnah rit lui lui une
-u rwai ha ïingmane.

"Sa shisien biang ka miet kristmas"
Ïa u ka pynkyndeh;
Shirta ïaka um lah ban klet
Jingrwai ba u ieid eh.

Dei hangta keiñ jingtngen u Shem.
Watla u long marwei,
Ha jingkynmaw ieid keiñ u rwai,
Ym ba u ïaroh blei..

I SIM BA PHER

      I SIM BA PHER
   

I sim ba pher, A ! Jingsngewieid,
I rwai jingsngewtynnat;
Ki khmat ïa i,nga ïit nga khmied,
Ha ki 'liar lapohïat.

La katta snem,ngam ju kynmaw,
Ïa i ngam ju ïohi;
Shano i jah im ju wan paw,
Marwei nga sdang kylli.

Ïa i hangta,nga shu peit seh,
Shawei ban phai ngam kwah;
Aïu i kam,aïu i leh ?
Kyntiak hala ka pnah.

I kup i phong, ki rongjemnud,
Lymphoiñ i jlih tyrsiang;
Ki sner i sad,i da syrpud,
Thapniang i sleh umphniang.

Hangne hangtai i dem kynthih,
I rwai teng teng i sngap,
Shane shatai i peit i khmih,
Ïoh don kiba ap thap.

Ïa i nga siaw nga bud byrthuh,
Sha nga i peit lyngngoh;
Ki sur bathiang i pah khatduh,
Nangta kdiar i her noh.

Ynda mynstep napoh jingthiah,
Ïa i nga ïohsngew biang;
Marwei marwei i rwai ïap ngiah,
Katno ka jingsngewthiang.

Man ka janmiet man la ka step,
Ïa i nga ïoh kynduh,
Ma i kumjuh tdot im ju pep;
I ïai don beit hajuh.

Pyrthei ki por ki mareh stet,
Ryngkat ki jingkylla;
Ïa i nga wad ngam lap syrwet,
La bun bun snem mynta.

Jngai bah na nga,i la her noh,
Sha lyndet jong ki lyoh;
Nga shu shaïong, nga sah lyngngoh,
Kumne i la iehnoh.

I sim baieid ba ai jingkmen,
Na nga i khlad jynduh;
Ki sur bathiang ba ai jingtngen,
A ! mynta shaei shuh.

Kumne marwei jingim jong nga,
Tang jingtylli suda;
Jylluiñ u 'nai khatsaw synñia,
Un sah dak jngem shirta.

Ko lapohïat to ïathuh lem,
Balei me i kynjah?
Bun jait ki sim ha me ki dem,
Balei kim lah ban pah ?

Pyrthei mariang ka neh hajuh,
Nga peit khlem lah ïohi,
Hangne ngam tip,ngam lah sngewthuh,
Ki ïaid ki por ki sngi.

;